၂၀။ ကံတွေကို ကျွမ်းကျင်အောင် ကြိုးစားကြစမ်းပါ။
ဘုရားရှင်ရဲ့ တရားတော်အရ ရုပ်လှခြင်း မလှခြင်းဟာ ဘာကိုအခြေခံနေသလဲ? မေတ္တာကိုအခြေခံ တယ်၊ ဒေါသကိုအခြေခံတယ်။ ဒေါသကြီးနေတဲ့ ပုဂ္ဂိုလ်သည်ရောက်လေရာ ဘ၀မှာ လှသလား? မလှဘူးလား? မလှဘူး။ မေတ္တာအားကောင်းနေတဲ့ သူတော်ကောင်းမှန်ခဲ့ရင် ရောက်လေရာဘ၀မှာ ဘာဖြစ်မလဲ? ရုပ်အဆင်း လှတယ်။ ဒီတော့ အလှပြင်ဆိုင်တွေ သွားနေဖို့လိုသေးလား? မလိုတော့ဘူး။ ဆံပင်ဆိုင်သွားပြီးတော့ ဆံပင် တွေ ကောက်နေဖို့လဲ မလိုတော့ပါဘူး။
ဆံပင်ကောက်တာနဲ့ပတ်သက်ပြီး ဘုန်းကြီးစိတ်ထဲမှာ မကောင်းတာလေးတစ်ခုတော့ရှိတယ်၊ တစ်ချိန် တုန်းက ဒီမှာ ကပ္ပိယဖြစ်သွားတဲ့ ဒကာသိန်းဟန်ကို ဘုန်းကြီးက စာအုပ်ကပ်ဖို့ တမာစေးတောင်းခံဖူးတယ်။ သူက တမာစေးမလှူဘူး။ ဘယ်လောက်ထိကြာသွားသလဲ ဆိုတော့ တစ်နှစ်နီးပါးကြာသွားတယ်၊ ဘာဖြစ်လို့ ပါလိမ့်လို့ စိတ်ထဲက စဉ်းစားနေမိတယ်၊ ကပ္ပိယ ဆိုတာက ခဏခဏတောင်းရင်လည်း စိတ်ကတစ်မျိုးထင်မှာ စိုးလို့ ဘုန်းကြီးကလည်း မပြောမိဘူး။ သူကလ မေ့တာလည်းအကြောင်းရှိတယ်၊ ရှားပါးတာလဲ အကြောင်း တယ်။ ဒါနဲ့ တစ်နေ့တော့ တမာစေးတွေရောက်လာတယ်။ ရောက်လာတဲ့အခါကြတော့ ဘုန်းကြီးက မေးကြည့် တယ်၊ ဘာဖြစ်လို့ ဒီလောက်တောင်ကြာရသလဲ? လို့ သူ့ကိုမေးတော့ သူက ဆရာတော် တမာစေးက သိပ်ရှား နေတယ်တဲ့၊ ဘာဖြစ်လို့ရှားနေရသလဲ လို့မေးတော့ အရှင်ဘုရား ဆံပင်ကောက်ဆိုင်တွေက ဒီတမာစေးကို သိပ် သုံးကြတယ်။ ဒီစကားကို ဘုန်းကြီးကလည်း မကြားဖူးဘူး သူပြောမှကြားဖူးတယ်။
ဆံပင်ကောက်တာနဲ့ တမာစေး ဘာဆိုင်သလဲ? အင်မတန် ဆိုင်နေတယ်တဲ့ ဘယ်လိုဆိုင်နေသလဲဆို တော့ ဆံပင်ကောက်ခါနီးမှာ တမာစေးကိုကော်ဖြစ်အောင် ရေဖျော်ပြီး အဲဒီတမာစေးကော်နဲ့ ဆံပင်ကို လိုတဲ့ပုံ ဖန်တီးလို့ရတယ်။ အဲဒီအခါကြတော့မှ ဘုန်းကြီးက စိတ်မကောင်းဘူး စာအုပ်ကပ်မဲ့ ကော်တွေတော့ ဆံပင်တွေ ပေါ်ရောက်ကုန်ပြီ လို့ သဘောပေါက်ပြီး စိတ်မကောင်းဖြစ်သွားမိတယ်။
ဘုန်းကြီးတို့ စာအုပ်ကပ်မဲ့ကော်တွေက ဆံပင်တွေပေါ်ရောက်သွားတဲ့အခါကြတော့ စာအုပ်တွေကို ကော် ကောင်းကောင်းသုံးလို့မရဖြစ်နေတယ်။
ဒီတော့ ခု မြတ်စွာဘုရားရဲ့အလှပြင်တဲ့နည်းစနစ် တစ်ခုကတော့ အဲဒီလို ဆံပင်ကို တမာစေးလိမ်းပြီး တော့ အလှပြင်နေဖို့လိုသေးလား? မလိုပါဘူး။ ကြိုက်တဲ့ဆု တောင်းရင် မရနိုင်ဘူးလား? ရနိုင်ပါတယ်။
၂၁။ သူ့ဂုဏ်ကိုနှိမ့်၊
ကိုယ့်ဂုဏ်နိမ့်၏။
သူ့ဂုဏ်ကိုမြောက်
ကိုယ့်ဂုဏ်မြောက်၏။
သူကလည်း သူ့ကံအားလျော်စွာ သူ့စီးပွားရေးအခွင့်အလမ်းတွေဖြောင့်တန်းပြီးတော့ ချမ်းသာနေတယ်။ အဲဒါကို မိမိကထိုင်ပြီးတော့ မကြည်ဖြူနိုင်ဘူး မနာလိုနိုင်ဘူး ဟိုလူ့ သွားတို့ ဒီလူ့သွားတို့ ဟိုနေရာသွားတိုင် လိုက် ဒီနေရာသွားတို့လိုက်လုပ်ပြန်တယ်။
တို့လိုက်တဲ့အခါကြတော့ အဲဒီကံလေးတွေက ခုလို ဘ၀မှာလာပြီး အကျိုးပေးတာပဲ မိမိနားမှာပြုစုမဲ့ ပုဂ္ဂုလ်တစ်ယောက်မှမရှိဘူး။ အနားကပ်ပြီးနေချင်တဲ့ ပုဂ္ဂိုလ်လည်းတစ်ယောက်မှာ မရှိဘူး။
ဘုန်းကံနည်းပါးရခြင်းသည် ဘာကိုအခြေခံသလဲ? ငြူစူစောင်းမြောင်းတဲ့စိတ်ထားကိုအခြေခံတယ်။ ငြူစူစောင်းမြောင်းတဲ့စိတ်ထားကိုမွေးမြူခြင်းသည် အခြွေအရံနည်းပါးစေတတ်တဲ့ ကျင့်ဝတ်ကိုကျင့်နေခြင်းပဲ ဖြစ်တယ်ဆိုတာကိုသဘောပေါက်ပါ။
သူတစ်ပါးတွေမှာ အခြွေအရံများပြားနေတာကိုမကြည့်လိုတဲ့ စိတ်ထားက မိမိအခြွေအရံနည်းပါးဖို့ရန် အကြောင်းတစ်ခုဖြစ်တယ်။ သူတစ်ပါးအရိုအသေ အလေးအစားခံရမှု အမြတ်နိုးခံရမှု အပူဇော်ခံရမှုကို အကြည့်လိုတဲ့စိတ်ထားက မိမိကိုလည်း ရိုသေလေးစား မည့်သူ မြတ်မြတ်နိုးနိုးပြုစုလုပ်ကျွေးမည့်သူ မရှိဖို့ရန် အကြောင်းတစ်ခုဖြစ်တယ်။ စိတ်ထားမတတ်လို့ရတဲ့အကျိုးတရားဖြစ်ပါတယ်။
သူလည်းသူ့ကံကြောင့် ဘုန်းကံကြီးမားရတယ်၊ အခြွေအရံတွေများပြားရတယ်။ ငါလည်းငါ့ကံကြောင့် အခြွေအရံနည်းပါးရတယ်။ များပြားရတယ်။
ဒီလို ကံ ကံ၏အကျိုးတရားကိုနှလုံးသွင်းတယ် ပိုက်ဆံ ဘယ်နှစ်ပြားကုန်သလဲ? တစ်ပြားမှမကုန်ဘူး။ စိတ်ဓာတ်ကိုပြုပြင်ပြောင်းလဲလိုက်တဲ့အတွက် ဘ၀အဆင့်အတန်းတွေ မြင့်မသွားဘူးလား? မြင့်သွားတယ်။
0 comments:
Post a Comment